நடிப்பு: அனிஷ் மாசிலாமணி, மைம் கோபி, கேபிஒய்தீனா, ராமச்சந்திர துரைராஜ், கலையரசன், சித்ரா சேனன், சித்து குமரேசன்
இயக்கம்: ஹரி வெங்கடேசன்
இசை: டுமே
தயாரிப்பு: தக்டம் மோஷன் பிக்சர்ஸ் – அனிஷ் மாசிலாமணி
நாயகன் அனிஷ் மாசிலாமணி மற்றும் கே.பி.ஒய் தீனா, ஒருவரை கொலை செய்ய திட்டமிடுகிறார்கள். ஆனால் எதிர்பாராத தாக்குதலில் தீனா காயமடைந்து விடுகிறார். அவரை காப்பாற்ற அனிஷ் ஒரு இடத்தில் தஞ்சம் அடைகிறார். இதே சமயம், அவர்களிடம் இருந்து தப்பியவர் தனது ஆட்களுடன் சேர்ந்து, தன்னை கொலை செய்ய முயன்றவர்களை தேடத் தொடங்குகிறார்.
மறுபக்கம், தீனா அனிஷ் அருகே இருந்தபடியே, அவரை கொலை செய்ய நினைக்கும் குழுவிற்கே உதவி செய்து வருகிறார்.
அனிஷ் மாசிலாமணி யாரை, ஏன் கொலை செய்ய முயன்றார்?
தீனா ஏன் இரு பக்கத்தவர்களுக்கும் உதவுகிறார்?
இந்த குழப்பமான சூழலில் அனிஷ் உயிருடன் தப்புகிறாரா?
— ரவுடி வாழ்க்கை, அதில் சிக்கி வாழும் மனிதர்கள் மற்றும் அவர்கள் அந்த நிலைக்கு எப்படி தள்ளப்படுகிறார்கள் என்பதை மையமாக கொண்டதே படத்தின் கதை.
“கத்தியை எடுத்தவனுக்கு கத்தியாலேயே சாவு” என்ற கருத்தை அடிப்படையாக கொண்டாலும், திரைக்கதை மற்றும் காட்சியமைப்பு படம் முழுவதும் விறுவிறுப்பாக இருக்கிறது. சில நேரங்களில் பார்வையாளர்களை சீட் நுனியில் உட்கார வைக்கும் அளவுக்கு பதட்டமும் திரைக்கதையில் சிறப்பாக இருக்கிறது.
நாயகனாக நடித்திருக்கும் அனிஷ் மாசிலாமணி, ‘மணி’ என்ற ரவுடி வேடத்தை நம்ப வைக்கும் வகையில் செய்து இருக்கிறார். தான் எப்படி ரவுடியாக மாறினார் என்ற வருத்தமும், தம்பி அந்த பாதையில் செல்லக்கூடாது என்ற கவலையும் அவர் நடிப்பில் நன்றாக வெளிப்படுகிறது.
கே.பி.ஒய் தீனா, ஆரம்பத்தில் சாதாரணமான கதாபாத்திரமாக தோன்றினாலும், திடீரென பெரிய திருப்பத்தை ஏற்படுத்தி கதைக்கு வலுவான மாற்றத்தை கொடுக்கிறார்.
மைம் கோபி தனது அனுபவத்தை பயன்படுத்தி, கதாபாத்திரத்துக்கும் படத்துக்கும் தனி பலம் சேர்க்கிறார்.
ராமச்சந்திர துரைராஜ், கலையரசன், சித்ராசேனன், சித்து குமரேசன் — குறுகிய வேடங்களில் இருந்தாலும், திரைக்கதையின் முக்கிய தருணங்களில் தங்களது பங்களிப்பைச் செய்துள்ளனர்.
ஒளிப்பதிவாளர் ஜானி நாஷ், சாதாரண லொக்கேஷன்களையே பல்வேறு கோணங்களில் படம்பிடித்து, கதையின் பதட்டத்தையும் இருண்மையையும் நன்றாக வெளிப்படுத்தியுள்ளார்.
பாடல்கள் இல்லாத படமாக இருந்தாலும், பின்னணி இசையில் டுமே பல இடங்களில் பதட்டத்தையும் வேகத்தையும் கூட்டியிருக்கிறார். சில இடங்களில் இசை சீரற்றதாக இருந்தாலும், பெரும்பாலும் திரைக்கதைக்கு வலு சேர்க்கிறது.
வெட்டு, குத்து, வன்முறை என ரவுடி வாழ்க்கையை காட்டும் படமாக இருந்தாலும், பிரவீன் எம்-ன் எடிட்டிங் இந்த வன்முறையை கூட கதையின் சுவாரஸ்யத்தை அதிகரிக்கும் அம்சமாக மாற்றுகிறது.
எழுதி இயக்கிய ஹரி வெங்கடேசன், சாதாரண கதையை காட்சியமைப்பு மற்றும் விவரிக்கும் முறையால் ருசியான படமாக மாற்றியிருக்கிறார்.
வன்முறையை வெறும் இரத்தச் சிதறலாக அல்லாமல், ரவுடிகளின் வாழ்க்கையில் இருக்கும் குடும்பம், வருத்தம், சோகம், காதல், இழப்பு, பழிதீர்ப்பு போன்ற உணர்வுகளையும் இயல்பாக காட்டியிருப்பது குறிப்பிடத்தக்கது.
மொத்தத்தில், ‘ஃப்ரைடே’ — சினிமா ரசிகர்கள் ரசிக்கும் படமாக அமைந்துள்ளது.
ரேட்டிங்: 3.2/5